王慧麟:論文盜版

2017031702

學術界最大的盜版奇案,就係有一班大賊,利用大學的數據庫,將碩士生同博士生的畢業論文下載同埋出版。

點解可以咁樣?大學一為神功,二為弟子。為咗知識傳播,即係一個好崇高之學術自由資訊交流之理想,將論文公開俾人下載,讓有心做學術研究的世界各地人士,唔使親身來到填表睇論文,或者要自己學校圖書館搵大學借來睇,其實道理上,冇人會反對,呢樣係學術自由之基石。

另外,如果因為數據庫開放,多些人睇、下載、引用,引用之指數好咗,對大學同學生都有好處。所以,一直以來都相安無事,而且外面仲有好評添。

問題係,有免費嘢,就會有人濫用。有錢搵,就會有人想辦法。於是,就有些大賊,想到呢條財路。老友話,呢班友絕對係有組織(至少係兩個啦),因為佢地會將論文之整個資料庫之名單下載,分晒類之餘,作者仲有中文名字,咁係需要一個programmer去做。跟手仲要有人分好上網賣,做digital marketing,咁唔會係一個人之手作仔。至少有一個會識得去搵晒同埋上去幾十個零售點去sell,唔係新手,係未?

不過,校友同學生反應係相當大。因為理論上,研究生固然係論文版權持有人,如果有人侵權,照道理應該係由版權持有人去處理。但今次情況,同以前響戲院盜版電影相似。一個片商(版權持有人),拍好一條片,搵咗間戲院(大學資料庫)去播映,跟手有賊揸住個攝錄機去拍片,然後個賊人集團將條片轉成VCD響旺角、荃灣同灣仔等勁多社團出沒控制之商場(全球零售點)賣緊。片商梗係緊張,搵戲院傾,喂,有人去你地戲院拍緊我套片去做翻版,你做下嘢得唔得,冇理由間戲院會答:唔好意思,你地片商係版權持有人,你地去各個商場搵班大哥大傾啦,不過咁,我都會盡力幫你地啦。呢種答案,唔可以接受啦!

究竟有乜嘢方案可以搞呢?咁至少間戲院都要做啲嘢,唔可以俾人可以隨便無聊地下載啦,係未要有個註冊系統,等每一個人去下載嗰陣,至少都要留低佢地嘅資料,先至俾佢地下載啦。到時追查起上嚟都會容易一啲。又例如響每一次下載之前,想下載嘅人,要同意一個聲明,裡面講明,下載作侵害版權之行為將會面對日後的刑事及民事追究,等做賊嘅人知道非法侵權係有法律後果,仲有,邊有畢業生個個去零售網站去叫人去將論文下架㗎,梗係想過辦法,例如請學生簽下一個委託書,請大學代為出頭,叫相關零售網站要求佢地一次過下架啦。

有朋友話,如果個班賊係響香港做呢啲嘢,應該要受法律制裁。香港係有法律保護嘅,版權之事,海關同警方啦!拉晒呢班賊啦!

刊載於am730 2017年3月17日