王慧麟:有樣嘢叫格局

2017051902

香港表面上好國際化,但格局就相當內向。主要因為我城素來都冇一種國際責任之氣魄及思維。用另一個角度來講,就係香江呢個城市好小器。

早幾日,如果大家早上中環返工,會忽然塞車塞足十幾分鐘?你心裡一定MM聲。然後,又有冇發現,你部手機忽然唔能夠打電話同上網呢?你以為一定係個網絡商玩嘢?其實,登登登凳,係因為巴基領袖來港訪問。

你會話,唓!有冇搞乜錯呢,呢個謝乜嘢夫,乜水呀,使唔使玩交通大擠塞呀?Well,如果閣下平日願意放低「屈濕」十幾分鐘,轉去睇亞洲區新聞,相信你會知道,呢個巴基之老細(唔係星),大概出巡十次,總會有一次遇到恐襲。老老實實,即係巴國老細遇襲風險極高,隨時玩緊死亡遊戲。雖然香江好命,近幾十年冇試過恐襲,但係萬一整單嘢,例如汽車炸彈爆一鋪,真係大吉利是。響一啲國家,整汽車炸彈只係學做恐怖分子之初階而已。

咁你就會明,點解電話網絡唔通。唔好意思,汽車炸彈之初階,係會用最老套的舊款2G芬蘭品牌之電話。呢部電話會駁住個炸彈。恐怖分子去便利店買張太空SIM卡,插落去電話之後,就會將部電話駁埋去炸彈,跟手黐埋去部車度。當恐怖分子打通咗呢個炸彈電話,就會引爆也。各位朋友,我勸你唔好走去google八卦下點樣整。因為當你用谷歌去搵之時,谷歌好多時駁你去由唔同國家安全部設立嘅扮恐怖分子網站。當你真係去睇之時,你已經被全球唔同國家之反恐機構盯上了。你部電腦隨時會被佢地監視中。咁樣,你就會明白,點解好多國家,買張SIM太空卡咁鬼煩。因為真係有恐襲之風險也。

我估你又會嘈,喂!咁鬼煩,唔好停留香江啦,快啲走返巴基啦。你又唔應該有咁嘅反應。因為巴基素來係北京好朋友,但同時又係反恐最前線,係美帝響阿富汗之物資補給中心。巴國領袖響南亞有巨大影響力,北大人又響巴國起咗一個貨運碼頭,無論地緣上同歷史上,巴基一直企響最緊要之地位。巴國領袖來香江幾日,其實只係畀面北京。香江遇上南亞大國之領袖訪問,真係好畀面,點解香江人有咁嘅反應呢?

呢個就係格局問題。香江華人崇美哈日,其他國家地區當作透明,唔覺得同巴基做個friend有即時之利益,惡之。同樣,有人對於政府豪擲幾十億去亞投行覺得浪費金錢浪費時間云云。咁表面又係,但香江已經係發達地區,照道理就應該做番有錢佬應做嘅嘢,就係去援助他國,幾十億係建立國際人格的入場費而已。

當然,大家對於係未應該磅水去亞投行係值得討論,但係,就唔應該唔畀囉。因為響國際大家庭,磅水先至有國際影響力。明未?

刊載於am730 2017年5月19日