王慧麟:一石幾鳥

2018032901

唔係好多人理解美帝響度點解打敘利亞。中東打仗,當然同我地離萬丈遠,其實同我地非常有關,因為我地係金融中心,任何影響金融市場之衝擊波,一定會殺過嚟。

侵侵國內好頭痕。因為佢做事癲得好犀利,但係就同共和黨主流好唔妥。日前共和黨大老Ryan唔出選國會議員,即係預示共和黨主流都怕中期選舉大輸。咁為神功又好,為自己都好,侵侵點都要博一鋪。加上佢依家響通俄門調查處下風,依家利用國外一場局部戰爭,有機會轉移視線。

侵侵響外交方面點都要示下強,而唔係示下弱。自從佢響上台之時試過射飛彈去敘利亞之後,真係冇乜嘢出兵維持一下世界秩序。咁樣落去唔係辦法。因為好多人會覺得,侵侵講就得,響社交網站吹水就得,似乎真得得把口。既然係咁,佢一定會搵個機會畀外界知道,佢唔係吹水之人,而係有行動之時,會大巴大巴咁樣星過去,唔好低估佢嘅決心。

呢樣嘢亦都適用響佢亞洲方面之操作。來緊五月,佢會同北韓金將軍見面。大家未必知道,響美帝之部分極右聲音覺得,侵侵唔應該見金將軍,畀人感覺美帝怕咗北韓。美帝唔應該響會面之前畀人示弱之感,而且美帝係有能力一隻手指捽死你,無論你背後有乜嘢勢力撐腰。

當然,你可以話,唓!敘利亞呢啲國家,點可以同北韓比較?北韓有核武,敘利亞乜都冇。咁嘅思路就真係錯晒。因為敘利亞背後,人前人後都話,係俄羅斯響後面撐住,伊朗響隔籬做啦啦隊。美帝打敘利亞,但係亦都係向俄羅斯打臉,打佢幾巴,仲要同伊朗打多巴。所以,大家唔好以為係美帝打敘利亞,而係美帝同俄佬之直接衝突,咁如果呢一鋪美帝大力痛擊敘利亞之後,俄佬真係好難企:因為俄佬係未願意因為敘利亞而同美帝直接開拖呢?俄佬有冇咁嘅實力同美帝較量呢?

侵侵亦可以透過今次事件,迫到西方盟友想清楚,係未願意同美帝一同做事。今次美帝吹響號角,法國即刻跟機,英帝亦都跟埋,咁樣係畀外界一個訊息,響美帝眼中的大事大非事件上,無論邊個做美帝一哥,盟友都會跟機。咁再唔好話美帝冇朋友,侵侵冇盟國,只要侵侵叫一聲,大家即刻歸隊。有啲朋友有一些比較特別的想法,以為侵侵上台之後,西方盟國離心,有利東方大國去拉攏云云,到咗最後,英法都係堅守響美帝身邊。

計來計去,美帝打一場仗,可以轉移國內視線,有利振奮人心,又有機會拖盟國落水,咁有震懾力,自己著數多,點解唔去盡啲?當然,打一場仗所整出來的金融震盪,侵侵一於好少理。睇住美帝可以忽然發脾氣然後去馬打一場仗,其他國家驚唔驚?

刊載於am730 2018年4月13日