王慧麟:安內定攘外

2018040601

好耐冇見老友A。你知啦,最近又話結束專政嘅人唔准選舉,又話老師響寶島講下大國的政治未來又會日日係咁鬧播毒,咁究竟乜嘢事呢?

老友A笑住同我講:你呢啲廢中學棍,除咗吹水,對北方大國國情,真係識條鐵。睇事情要先睇大氣候,然後先至睇小氣候。咁大氣候係乜嘢?依家就係北方大國,響外交方面真係出咗事誤判連連。先是以為侵侵玩貿易戰只係講笑而已,點知人地動真格,咁已經係誤判number one。又以為美帝對兩岸局勢都係平穩為主,唔敢支持英文總統,點知美帝就唔單止簽咗份《台灣旅遊法》,仲派咗個亞洲政策number two去台灣宣示支持。好啦,響金將軍核彈危機嗰陣,又真係出現美朝韓三角會議,北方強國隨時由過往嘅積極參與,變成會議後被告知之亞洲周邊國家,唔係好對路也。所以呢個月,你地見到「yellow藝」日日穿梭鄰近各國補飛辦外交,你就知依家形勢幾不妙啦?

老友A仲話,依家北方某啲大人先至發覺,侵侵上台扮friend,實際上係聯合緊亞洲各國,一齊玩制中。咁當然,北方強國之後發制人嘅手法,都唔會太差,但係就鑊鑊都係當作危機處理咁樣去操作,咁至高無上之偉大領袖梗係會問,邊條友估錯晒國際形勢,搞到依家處處受到遏制呢?咁梗係要搵人去祭旗啦,係咪?

老友A飲完杯咖啡續曰:我地香江都算係美帝聯同亞洲盟友「聯手制中」之一個前哨陣地,響呢方面我地香江之表現點先?咁兩會過後,上面大局已定,聽聞有人開始問,點解香江之情況咁不妙,呢期香江究竟發生乜嘢事?既然美帝利用香江作為制中之棋子,點解香江呢邊好似乜嘢反應都冇?係咪由得班外國勢力響度不斷搞搞震呢?咁於是又有人問,過往幾年,邊班友搞到香江立立亂,搞到香江冇晒準備,去迎戰侵侵呢啲外部組合拳呢?

老友A話,有啲人覺得,依家侵侵殺埋身,唔好顧住打內部毒勢力,不如先穩住香江個局,然後集中火力去對付美帝,即係「先安內後攘外」啦。但有啲人覺得,要打擊美帝,就先要打殘嗰啲,過往十幾年響香江同美帝黐埋一堆又搞乜嘢毒嘅廢青黃絲,咁樣先至有震懾力,迫美帝唔敢搞,即係「攘外必先安內」啦。老友A笑住講,過往五年,都係後者嗰班佔上風㗎嘛,嗰啲budget都係俾後者壟斷晒,如果依家俾「先安內後攘外」佔上風,呢五年風生水起嘅人事組織咪死晒火?香江唔立立亂,唔係內部有分裂,大家邊有飯開先?

老友A話:依家國力咁強,乜嘢大學老師?上面一隻手指都捽死你啦。依家係頂層想搞團結拼大灣,下面就想撕裂谷五毒,上面睇大局,下面要budget,大纜都扯唔埋。好打得有排煩矣。

刊載於am730 2018年4月6日