王慧麟:侵侵的火力

2018061501

唔好意思,我同好多朋友對侵侵的睇法有啲唔同。我知,有啲朋友覺得,侵侵係一個做「刁」嘅生意佬,佢都只係睇有冇著數之商人,冇乜嘢意識形態之考慮。佢咁上下佢就會返番政治現實,走番中間路線。老老實實,合則兩利,和和氣氣,依家侵侵都只係吹水而已。

另一啲朋友就會覺得,侵侵其實知道美帝經濟麻麻,實力未得,即使係加息周期,力道仲係唔高,實力唔係太夠。依家佢就係典型之做「刁」作風,舢舨充炮艇,吹得就吹,只要各國畀啲甜頭佢,佢滿意收貨就搞掂。因為如果美帝真係硬砌貿易制裁甚至軍事行動,最終都係火燒後欄玩死自己。

又有一啲朋友覺得,佢明知得罪緊各個國家各個盟友,一樣要硬去搞制裁同反檯,主要理由係要處理年底國會選舉。因為侵侵到底都係共和黨之少數派,又得唔到共和黨之主流支持。佢唔去衝贏個國會選舉,如果年底國會選舉攬炒,佢點死推死賴都唔掂,隨時共和黨主流力量會打低佢。所以依家一於擺大個頭,得罪全宇宙都好,總之就四圍點火,以捍衛美帝利益為主軸,一於衝高番民望,贏咗年底選舉先算。

咁啦,我都一直批評侵侵搞亂檔,但係,唔鍾意佢係一回事,點樣冷靜思考同埋回應佢之行為,就係另一回事。究竟佢係一個真係乜嘢意識形態都冇嘅生意佬,定係其實佢係有一張底牌,有一個底線,死都唔話你知,詐傻扮懵之政客呢?呢一年睇到,侵侵不至於係一個老謀深算之政客,但佢唔係一個徹頭徹尾之生意佬,佢係有一套想法,但呢個想法係點樣,佢唔同你講清楚而已。

響印太地區,侵之策略,就係要圍堵強國。總之,話之侵侵成日話,佢同強國主席個人關係好好,但係口講一回事,心嗰句就係,唔like強國,一定要夾到強國好唔舒服,要用盡方法去圍堵強國,夾到佢頂唔住外部壓力之時,迫到佢領導層內部立立亂,令強國領導冇時間去部署同埋回應美帝。

講到呢度,你一定會話,我又係講緊果啲和平演變之說法:即係美帝要迫強國走和平演變之道路。呢樣你就錯了。觀察咗侵咁耐,佢真係唔係好關心別國之人權自由狀況,佢又唔係好理別國有冇regime change,即係政權改變。佢身邊班極右派,唔係唔理別國之民主自由人權,只不過覺得,呢啲嘢priority唔高。而且,如果美帝搞到人地國家又政權轉變又呢樣嗰樣,咁美帝又要收拾殘局,好鬼煩。總之,侵響印太地區,就係夾到你強國又痛又唔舒服,但又理得你日日打壓維權人士,唔係好關心你有冇發展民主自由,仲有最好唔好倒台,因為咁樣盞搞到大家煩晒。

咁樣嘅美帝外交政策,真係好少見。點對應?你話呢?

刊載於am730 2018年6月15日