王慧麟:一國一制

2018070601

老友A同我講,七一前後,一個好重要的訊息,就係要宣傳,仲要大大聲嗰隻,話香江的「一國兩制」非常成功兼好很成功!

點解要咁呢?老友A話,佢識一個剛剛響北京月壇南街77號送外賣之外省低端勞工。呢位工人叔叔響廁所聽到,近期美帝有意無意響度試探式地問北方大國,究竟香港係唔係行緊「一國一制」云云。唔單只一次,仲要幾次。咁樣令北方某啲人士懷疑,美帝會唔會響香港問題上搞搞震。

點解北方大國咁緊張呢?唔使老友A講都知,依家侵侵政府四圍發晒狂咁去搵嘢攻擊北方大國。咁係有方方面面的操作。一個北方大國擔心嘅,係美帝幾時啟動大搞「借港制中」呢個策略。即係美帝借香港事務去搞亂中國。因為北方大國看到,響呢個「借港制中」策略下,美帝盟友一早做嘢了。例如美帝朋友台灣,English Choi的手下,經常狂請香江泛民朋友訪台。咁台港關係緊密咗,泛民好自然就越親台,製造一種「聯民制中」的形勢。而「聯民制中」係美帝「借港制中」大策略下,其中一個組成部分。

咁美帝「借港制中」之意思係,美帝借干涉香港事務,搞到中國好頭痕。老實,香港係自由港,美帝響貿易戰方面打香港主意,並唔容易。而且,香港一直響貿易戰上都係做好人,聽晒話,咁又好難砌生豬肉話香江對美帝傾銷產品。於是,美帝用唔到貿易手段,唯有以政治手段處理問題。美帝之最好方法,就係不斷話香港冇一國兩制,香江已經失去自由,乜嘢都向下沉淪。只要美帝認為,香江的「一國兩制」收工,變成「一國一制」,咁美帝就可以要脅北京,對京施壓,打瓜之。

咁美帝會做乜?具體嘢老友A鬼知咩?但既然美帝講得出香港係未搞緊「一國兩制」,咁香江應該要小心準備囉。一方面,上面大國大開論述機器,不斷唱好一國兩制,目的就係「唱得出口,都有幾成真」,唔好畀美帝有機會唱衰香江。另一方面,應該就要響具體事務上,香港有啲政策的確係「一國兩制」之典範囉,唔好咁輕易因為侵侵會鬧幾句,而唔去痛斥侵侵亂搞事實啦。

不過要同美帝抗衡,談何容易呢?因為抗美唔係請客食飯,而係要響商貿戰上廝殺。香江之官員,特別係好打得嗰類,打鬧自己人同下屬就最叻,要佢地抗美反美,我真係唔識講,唔知佢地敢唔敢同美帝針鋒相對。

另外,美帝借港打中,如果香江官員處理得唔夠好,軟硬手法拿捏得唔好,回應衰咗的話,就會為北方大國添煩添亂,反而令美帝有機可乘,加大咗侵侵制中之力度及效應。依家香江領袖唔係成日講wasting time浪費時間嗎?防止美帝借港制中,好打得唔可以wasting time了。

刊載於am730 2018年7月6日