王慧麟:搵食

2018080302

老友A同B約埋飯聚,閒話家常。我呢啲年近半百,一事無成,人生早已無晒目標之麻甩佬,仲有朋友約食飯,梗係去啦,仲使講?

老友A之仔女,在番鬼國工作,唔回港了。梗係啦,我都叫佢唔好咁樣做。佢仔女響番鬼國讀之學科,雖然係好前沿好創科,但響香江真係無用武之地。返來可能都係去金融機構賣產品,不如留在番鬼國。數下數下,我地社會又冇咗兩個人才。

老友B之仔女,又係另一個番鬼國大學畢業。一個係讀我嗰瓣,即係法律,問下佢仔女有冇興趣回港考試做律師,老友B話,個細路聽完響香港要做律師之途徑,二話不說No No No。

都係嘅,今時唔同往日,依家響香港讀專業試嗰部分,過五關斬六將,元氣又大傷,老竇老母冇人脈嘅,考完都係響中環浮浮沉沉,索性響番鬼國做嘢。另一個仔女呢?老友B話,呢件考完畢業試已經搵到份工,人工唔高不過都係同學科有關嘅嘢。老友B話,佢讀嘅嘢咁冷門,返香港都冇用,不如響番鬼國做嘢,唔返來了。數下數下,身邊有老友之四個仔女,去完番鬼國讀完書都唔響香港做嘢。

所謂人各有志,又唔可以話,呢幾個青年唔返來香港係一件壞事。老實,我都算響外國打過工,至少知道響外邊做嘢之情況,一樣同響香港一樣tough。大抵響世界上番鬼國做嘢,都係同香江一樣咁長工時又多嘢做。只不過,依家同輩老友之仔女,都係響香港長大受教育,最後要響外國做嘢,咁就有啲可惜。

因為香港要成功,一定要係人才聚寶盤,即係乜嘢檔次嘅人才,都願意響香江搵水至得。即係點呢?即使你嘅仔女係讀一啲相對冷門之專業,一樣有得撈。即使你嘅仔女,讀書麻麻,但一樣可以有一啲工種,可以做得好好。社會上機會係畀上中下路人才都有得搵食,先至可以繼續繁榮下去。

如果依家香江只係部份行業先至有上中下路人才做嘢,其他工種及檔次又少,咁就自然冇人願意來香江搵食。久而久之,香江啲行業,就係縮剩某幾個行業而已。咁依家響外國讀書嘅香江青年,咪思前想後,唔想返來香港先囉。咁樣香江只係聚到某幾個工種之人才,真係唔得掂。

呢二十幾年來,香江青年面對萎縮之工種及市場,搵得又少,已經好唔開心,然後在上者又叫青年奮起北上搵食,咁青年一定爆啦。老實,香江已經冇咗讀書上位向上流動之神話。政府搞唔掂成個經濟同產業多元,然後叫青年北上,青年咪覺得香江之在上位者,係未有病呢?佢地會鬧,你地有權有勢卻醫唔好經濟反而仲有幾十萬人工一個月仲叫青年北上搵食,難怪青年火滾啦。如果香江再唔係人才聚寶盤,真係值得擔心。

刊載於am730 2018年8月3日