王慧麟:風高浪急

2018081002

已經不止有一個人提醒在下,近十年香江政治有北大人因素。此話怎說?九七前,香江英治,英帝內政絕少在港伸延,即係你唔會發現,保守黨內鬥,例如戴師奶勇鬥馬卓安之時,香江會出現保守黨內兩派響香江街頭互劈。但係時移勢易,依家唔同晒咯。北大人派系林立,省市各有唔同派系人馬,已經慣咗互劈,咁樣香江之最高領導,又有西環金鐘兩個,而上面各派已慣咗火拼,香江點會例外呢?

所以,老友A提醒,香江如果出現古靈精怪之事,第一個思考嘅並唔係香江自身之政治情況,而係要先思考北大人依家忙緊咩嘢,心煩咩嘢,多疑咩嘢,咁先至好好細心去思考,依家香江某啲政客,點解又突然要扯起一支反xx反yy之大旗。

老友A叫我去睇下寶島政治。唉!!已經忙到爆炸,連覆短訊同電話都冇時間,仲要返工畀人嘈,話點解唔用短訊回覆,覆錯人呀,大哥,真係火都嚟。經老友A指點,點都去睇下寶島發生乜事。我問老友A,係未嗰單廣告影射陳文成事件嘅事?佢話,梗唔係啦,而係English Choi去取締中華統一促進黨。呢個黨個精神領袖,就係一位道上之江湖大哥大White Wolf。佢係乜嘢人?總之,佢地班道上大哥同會員,最犀利就係響上次太陽花運動挑機啦,佢地啲會員及支持者,會響大街大巷高舉五星旗遊行啦,仲有仲有,有人同佢理論,就會收到粗口同拳頭咁。呢個咁有拳頭力量之組織,傳咗好耐就係由對岸某啲派系「磅水」也。

總而言之,當有需要時,佢地就會同支持台獨之組織挑機,總之就不斷話阿A,阿B係台獨,邊個邊個學生領袖係台獨,然後就會去呢啲組織門口嗰度示威反動員。總之有台獨,就有呢班大哥大響度。冇人搞台獨呢,佢地都要搵方法同組織,批評睇唔順眼之人搞台獨。咁如果有人被佢地話係台獨,呢位仁兄就真係好頭痕。對於White Wolf,原本English Choi冇郁佢,因為White Wolf,堅係道上大哥大,同兩個黨都有交情嘅。但依家兩岸交惡,而大哥大之兄弟,又曾經係咁追打支持台獨之大學生,咁咪派差人去拉人封艇囉。

老友A話,佢發覺呢位大哥大出動之時,往往就係北大人響對台政策嗰邊,有可能出現一啲改動之時,又或者北大人對台系統有某啲事發生之時,佢地亦會出動。我就問老友A,點解會咁樣?老友A話,好難一概而論嘅。舉例啦,當吹下水啦,例如當北大人對台之系統出現內鬥,講到應該懷柔定強硬之時,呢班White Wolf就會出動,製造一個台獨猖獗,台北立立亂之印象,迫北大人表態唔可以放棄強硬之政策。老友A話,對台政策牽涉好多資源之流向。北大人有某一派得勢,就可以Cap水,錢呀!權呀!明白未?

刊載於am730 2018年8月10日