王慧麟:收咗柯打

2018090701

事情已經清晰咗,原來上面係有柯打,叫香江好打得做23條。既然收到風,即係要做嘢啦。要令到做23條立法順順利利,有人覺得,用番以前啲招數,一定掂。呢一招就係先搵一個稻草人,即係「獨」人(有s㗎,有單數有眾數),然後就圍攻之。而且,又有人可以乘機,借此機會去「隊」香江最高領導,鬧阿姐響港獨面前唔打得。

呢一招真係好陰險。如果好打得唔做23條,就會畀人圍插佢辦事不力,連大是大非立場國家主權立場就站不住,點樣做領導香港落去?呢啲罪名,一棍咁樣打落去,就會削弱好打得之權威,咁樣一點一滴落去,有人想連任香江最高領導之位置,真係要不斷攀上高峰,好多暗湧呀。

如果好打得即刻做,即係證明嗰班人辦事得力,聽晒大老闆指示,直頭係打晒兔仔印花,加晒信任分,下年兩會派各級人大政協餅仔,予取予攜。所以話,響上面搞政治,只要寧左勿右,信者得救,長做長有。理性地搞政策講理由,愚笨又老實,輸了立場又失分,仲畀人笑你愚公移山不如去移民,係未?

江湖就係咁險惡,浪花四濺,內有暗湧,企錯些少隨時沒頂。但今時唔同往日,依家搞23條,民情唔會有反彈。點解咁講?第一,民主派能量死晒,又冇號召群眾之能力,點樣企街站反應唔會太好,都唔會太差,響咁嘅民主派低潮之下,就算聽日要搞23條,民主派朋友又可以做到幾多嘢?

第二,自從雨傘運動之後,又DQ又呢樣嗰樣,基本上市民都明白到,以往嗰啲寬鬆環境已經不再,冇香江領導會走去捍衛香江呢一制,只要上面下旨,香江各路人馬自動埋位打壓,任何法律手段都會做盡。有冇23條,已經冇乜意義。你會話,唔係呀,民主派好多粉絲,到時候會上街同你嘈過呀,政府要因住呀等等。但經過雨傘之後,香港人醒覺咗。佢地唔係醒覺民主自由之可貴,而係醒覺咗同政權硬撼根本冇意義。依家係建制派全面及完全執政之時候,佢地想過乜嘢法案,想點就點,泛民唔通又一百萬人去佔領中環咩?就算聽日政府真係推出23條,民主派再號召佔領,又或者佔領全地球,你估立法會唔會通過咩?

所以,點都好,依家香江市民都明白,唔好再發春秋大夢,以為響香江,可以避開上面的政治旋渦,安心響香江搵錢做人。依家上面政治風高浪急,波及香江,各路人馬各有盤算,只要北大人開句聲,自然就會有班人借北大人已定下之政策,響香江興風作浪。而且,從強人上台之後,過往幾年可見,香江嗰啲溫和務實聲音,基本上都冇見過。依家仲話23條同政改一齊搞,希望推動上面之建設性聲音?Are you dreaming? 依家唔係1988年矣。

刊載於am730 2018年9月7日